منابع محلی در تخار می‌گویند مقام‌های محلی این ولایت برای محصلان فارغ‌التحصیل در پوهنتون تخار اجازه پوشیدن چپن و کلاه سیاه را ندادند.
به گفتۀ منابع خبری، مقام‌های پوهنتون تخار روز پنجشنبه، 21 سنبله، برای نزدیک به 823 فارغ التحصیل این پوهنتون محفل جشن فراغت برگزار کردند.
در این مراسم 250 تن از محصلان فارغ‌التحصیل از پوهنحی‌های زراعت، تعلیم و تربیه، اقتصاد، حقوق، شرعیات و انجنیری پوهنتون تخار، که از مقطع لیسانس فارغ شده بودند، اشتراک کرده بودند.
به نقل از این منابع، مولوی کمال‌الدین منیب، رئیس پوهنتون تخار برای اشتراک کنندگان این جشن، پوشیدن چپن و کلاه سیاه را ممنوع اعلام کرد.
مقامات این پوهنتون می‌گویند که شاکرالله وحدت، رئیس دعوت و ارشاد وزارت تحصیلات عالی طی مکتوبی رسمی به رؤسای تمامی پوهنتون دستور داده است تا از چپن و کلاه سیاه در جشن فراغت استفاده ننمایند.
این مقام حکومتی سرپیچی از این دستور را «بغاوت» علیه نظام خوانده است.
